E cau na NJV e na vei-vakalivalivataki e na Tikina ko Namosi

DSCN1052
Tomana na dauteitei mai Namosi na volitaki vuani qele kina kabani na Namosi Joint Venture
October 4, 2012
Sainitaki na veidinadinati ni Veitokoni
October 25, 2012
Show all

Sa solia na kabani na Namosi Joint Venture (NJV) e $23,909.20 kina Tabana ni Vurevure ni Kaukauwa ni matanitu, me vakailavotaki na vei-vakalivalivataki e na Tikina ko Namosi.

Na uma i lavo koya, sa okati me nodra cau na lewenivanua e na Tikina ko Namosi me vaka e gadrevi mai na Matabose ni Livaliva.

A kerekere kina NJV na Matabose ni Yasana ko Namosi kei ratou na 5 na turaga-ni-koro e na loma ni Tikina, me veivuke na kabani e na cau e dodonu me ra solia na lewenivanua.

Me vaka e virikotori e na porokaramu ni vei-vakalivalivataki e na taudaku ni koro lelevu, e dodonu me cau ni matanitu e 95 na pasede ni sau taucoko ni vei-vakalivalivataki ka nodra cau na lewenivanua e 5 na pasede.

Vakaraitaka o Greg Morris na Manidia liu ni kabani e na noda vanua, ni lewa me sauma taucoko na kabani na cau ka dodonu me ra solia na lewe ni Tikina, me vaka ni gadrevi ni livaliva e dua na tiki ni vei-vakatorocaketaki.

“Ni vakadavori tiko na i dusidusi e taurivaka na kabani me baleta na veivuke kina veivakatorocaketaki e vagolei vei ira na lewenivanua, e dua na ka e rogoci vaka-wasoma mai vei ira na veikoro e na loma ni tikina, o ya na basika mai na gadrevi ni vei-vakalivalivataki me vukea na veiqaravi eso wili kina na koronivuli na Namosi Secondary kei na Primary School, me vukei ira na gonevuli e na gauna ni nodra vuli lesoni e na veiyakavi kei na veidredre tale e so e ra sotava na veivuvale,” kaya o Morris.

“Na kena rawati na livaliva, sa vukea na vakatorocaketaki ni bula vei ira na lewenivanua e na gauna qo kei ira era na qai muri mai ka dolava vaka-kina na sala ni vei-vakatorocaketaki e na bisinisi kei na veisasaga tale e so.”

E vakaraitaka o Aselemo Vakadranu na mata ni Tikina o Namosi kina Bose ni Yasana na nodratou marau e na veivuke vakaitamera oqo mai na kabani na NJV.

“Na veivuke oqo me vaka e tabaki e na neitou i vola kerekere – e na vukei ira vakadodonu na lewe ni tikina, vaka-vinakataka na ivakatagadegede ni bula vei ira na lewe ni yasana, vakabibi ni bera tu e na vei-vakatorocaketaki e na neitou vanua,” kaya o Vakadranu.

“Sa kena gauna me keimami vaka-vinavinakataka kina na levu ni cau dou sa solia tiko me baleta na vei-vakatorocaketaki e na loma ni neitou tikina.”

“Keimami nuitaka ni da na cakacaka-vata tiko e na veitaba yabaki kiliu, vakabibi e na kena vakatorocaketaki tikoga na loma ni tikina,” kaya o Vakadranu.

E ra na vukei mai na vei-vakatorocaketaki oqo ni vei-vakalivalivataki na koro o Waivaka, Narukunibua, Nasigatoka, Namosi koro kei Navunibau.